पहाडबाट पर-पर
प्रतिमाहरू भागिरहेछन्
गढी, गौंडा र गल्लीहरू
तिम्रो गस्ती मागिरहेछन् ।
प्रशान्त पहरा
पर्वत भएर उठ
अलिकति उच्चाइ थपौं र
सम्मान-गारद अर्पण गरौं हिमालयलाई ।
क्यामरामा लुकेर गए
शान्तिका आँखाहरू
सारङ्गीमा सुकेर गए
स्वदेशी भाकाहरू
हत्केलामा सीप र
सुसेलीमा सिर्जना गाउँदै उठ
शान्तिका आँखा रचना गरौं र
सम्मान-गारद अर्पण गरौं बुद्धलाई ।
आफ्नो भन्नु त्यही बुद्ध हो
बुद्धका आँखाहरू हुन्
आफ्नो भन्नु यही माटो हो
माटाका पाखाहरू हुन् ।
बुद्धका आँखा नरहे
हामी युद्ध हुन्छौं
माटाका पाखा नरहे
टुहुरा हुन्छौं
आऊ माटाको माया रोपौं मुटुभरि र
सम्मान-गारद अर्पण गरौं नेपाललाई ।