सन्देश / सुमन पोखरेल

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

सुमन पोखरेल » इत्थंविध चित्र : इत्थंविध कविता »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

आफ्नै छुद्र स्वार्थको पोखरीमा पौडिरहेको मान्छेलाई
फुर्सत हुँदैन कसैको सल्लाह सुन्ने
भ्याउँदैन ऊ बुझ्नलाई आफ्ना हितैषीका कुरा ।
 
जब आफ्ना लोभहरूमा चोबिएर
आफैँलाई घात गर्न थाल्दछ मानिस
जब उद्धत हुन्छ आफैँलाई विलुप्त गराउन
र
अरूलाई बिर्सँदा बिर्सँदै जब
आफैँलाई बिर्सन थाल्छ मानिस
तब खोलिदिन्छ समयले आफ्ना सन्देशका अन्तर्यहरू
देखाइदिन्छ जोखिमका अनेक रूपहरू

हिँडाइको यस विन्दुमा आइपुगेर
एकपल्ट फेरि टक्क अडिएको छ समय
सङ्केत गर्दे आफूले ल्याएको सन्देशप्रति
देखाउँदै मानिसका कर्मका परिणतिहरू ।

बुझ्न चाहने वा बेवास्ता गरेर
उही भुमरीमा गुजुल्टिरहने
मान्छेको रोजाइको विषय हो ।

युगौँदेखि निरन्तर
केही न केही सन्देश बोकेर
हुलाकीझैँ
निरन्तर दौडिरहेको छ समय ।