अध्यात्मयात्रा / गीता त्रिपाठी

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

गीता त्रिपाठी » इत्थंविध चित्र : इत्थंविध कविता »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

 
कैयौँ वर्षहरू हिँडिसकेँछु,
भीड र कोलाहलका एकान्तका बीचैबीच
बाँचिदिएर आफू समावेश नभएजस्तो एउटा जिन्दगी
निक्लेको रहेछु, खै कुन गन्तव्यको खोजीमा !

कहिले अक्षरहरूजस्ता बाटो भएर पनि हिँडेछु
कहिले बाटोजस्ता अक्षर हुँदै पनि हिँडेछु
सुक्दै गरेको गहिरो कुवाबाट पानी उबाउन खोजेझैँ
गर्दै हिँडेछु बुझ्दै नबुझेका कामनाहरू
खोज्दै हिँडेछु देख्दै नदेखेका आनन्दहरू ।

कहिल्यै नटुङ्गिने हिँडाइबाट
मोडिएको छ यात्राको परिवेश अब
बद्लिएको छ मेरो हिँडाइको बाटो
फेरिएका छन् मेरा लक्ष्य र गन्तव्य ।

हिँडिसकेको बाटोको पल्लो छेउको यस विन्दुबाट
अन्तिम गन्तव्य बनाएको छु यतिबेला
आफ्नै चैतन्यको सूक्ष्म विशालतालाई ।