आँशुको समुद्र / मौन आवाज
आखिर बगेर गएछ
आँखाबाट आँशु !
रहला - बस्ला - नबग्ला भन्ठानेको थिएँ - आँखाको आँशु -
आखिर बगी गएछ !
आँशु
रगत झैं जम्ला - इतिहासको एउटा कुनामा भन्ठानेको थिएँ
जमेनछ !
आँशु
हिउँ झैं जम्ला - अन्कण्टार एउटा पहरामा भन्ठानेको थिएँ
जमेनछ ।
आँशु
मध्यरातको जूनको प्रकाशमा जम्ला भन्ठानेको थिएँ
जमेनछ ।
आँशु
बिहानीको शीतमा जम्ला भन्ठानेको थिएँ
जमेनछ ।
आँशु
यादहरूको पोखरीमा जम्ला भन्ठानेको थिएँ
जमेनछ !
आँशु
प्रेमीहरूको कोमल हृदयमा जम्ला भन्ठानेको थिएँ
जमेनछ !
आँशु
चिसो माटोमा जम्ला भन्ठानेको थिएँ
आँशु
जीवनको बीच बाटोमा जम्ला भन्ठानेको थिएँ
जमेनछ !
आँशु
कतै जमेनछ !
आँशु
जम्ला भन्ठानेको थिएँ - सम्बन्ध झैं टुक्रिएका बरफका टुक्राहरूमा
तर / जमेनछ !
आखिर बगेर गएछ
आँखाबाट आँशु !
आँशु
आँखा मै जम्ला - रोकिएला - सकिएला भन्ठानेको थिएँ
आखिर बगी गएछ !
आँशु बगेर एकदिन मरुभूमिमा सुक्ला भन्ठानेको थिएँ
आँशु त समुद्र भएछ !
०००
