भारत की संस्कृति के लिए... भाषा की उन्नति के लिए... साहित्य के प्रसार के लिए
बिरथा कूक्यो कबीर / मदन गोपाल लढ़ा
Kavita Kosh से
आशिष पुरोहित (चर्चा | योगदान) द्वारा परिवर्तित 16:50, 29 नवम्बर 2010 का अवतरण (नया पृष्ठ: {{KKGlobal}} {{KKRachna |रचनाकार=मदन गोपाल लढ़ा |संग्रह=म्हारी पाँती री चितावां…)
दुनियां रै सगळा मिंदरां में
जे आपां बजावां
एकै सागै घंट्यां
तो सुणिजैला उणरी टणकार
एवरेस्ट री चोटी माथै।
धरती री
सगळी मस्जिदां में
जे अदा हुवै नमाज
एकै भेळी
तो उणरा बोल
पूग सकै
उतरादै धू्र तांई।
आखै जगत रै
गिरजाघरां में
हुवै जै प्रार्थना
एकठ
तो उणरी गूंज
गूंजैला
आभै रै पारोपार।
बिरथा कूक्यो कबीर !
घंट्या, नमाज अर प्रार्थना रो हाको
मचा राख्यो है धरती पर
फेर थूं ईं बता
कींकर सुणीजैला
उण नंगधड़ंग
भूखै टाबर रा
बुसबुसाटिया !
