भारत की संस्कृति के लिए... भाषा की उन्नति के लिए... साहित्य के प्रसार के लिए
अपने में बात / राम सिंहासन सिंह
Kavita Kosh से
आवऽ सब मिलके करी अपने में बात
सायद मन बहल जईतो अउ कट जइतो रात
कबतक हम बोयब बेर आऊ बबूल
गमले में सीचऽब हम गन्धहीन फूल
कुहासा के होयत अब कब तक आयात
आवऽ सब मिलके करी अपने में बात
भीड़ में खो गेलऽ हे अपनापन आज,
सिर पर मंडरायत हे स्वारथ के बाज
दामन पर लग रहलऽ हे मीतवन के घात
आवऽ सब मिलके करी अपने में बात
सबके सब भटक रहलऽ हे मौसम हे प्रतिकूल
अर्थहीन जीवन के आँक रहल हे मूल्य
केकरा हम सौंपी आज यस के सौगत
आवऽ सब मिलके करी अपने में बात
कइसन बहल हवा जे चर्चित हे गुमनाम
जीवन के मूल्य के अब उतर रहल हे दाम
अँधियारा अब दे रहलऽ हे सूरज के मात
आवऽ सब मिलके करी अपने में बात
ढा रहल कहर रोज दर दरदीला साम
कइसन ई समयय आयल संयम भेल बदनाम
बेबसी के घेरा में अब कैद हे सुप्रभात
आवऽ सब मिलके करी अपने में बात
