भारत की संस्कृति के लिए... भाषा की उन्नति के लिए... साहित्य के प्रसार के लिए
आँखी में सजलोॅ सपनमां हे भौजी / राजकुमार
Kavita Kosh से
आँखी में सजलोॅ सपनमां हे भौजी
निंदियो नै आवै
असरा में भिजलोॅ नयनमां हे भौजी,
निंदियो नै आवै
तोरोॅ ननदोइया पीरितियो नैं जानै
कुमुद, पपिहरी के बतियो नै जानै
स्वाती बिन चातक परनमां हे भौजीं
निंदियों नै आवै
बरसै बदरबा बिजुरिया निहावै
हमरॉे लहरलोॅ उमरिया सिहावै
टिटही रं टगलोॅ जीवनमां हे भौजी
निंदियों नै आवै
हरियैलोॅ धरती रोॅ हरियैलोॅ मनमां
झिमिर-झिमिर फुहिया में तिलोॅ तपनमां
धरती रोॅ गहना गगनमां हे भौजी
निंदियों नै आवै
अरबा पीरितियो दूअरिया निहारै
नदिया रोॅ पनिया लहरिया निहारै
उचरै छै कागा अँगनमां हे भौजी
...निंदियों नै आवै
