भारत की संस्कृति के लिए... भाषा की उन्नति के लिए... साहित्य के प्रसार के लिए
आठ कोड़ गूंगा / कन्हैया लाल सेठिया
Kavita Kosh से
आठ कोड़ बण्या थे गूंगा
किंयां हुसी निसतारो ?
मायड़ भासा राजस्थानी
कळपै, बीखो भोगै,
हाळण बणगी निज रै घर में
दूजा थाळ अरोगै,
नहीं बावड़ै बगत गयोड़ो
चेतो, भविस विचारो !
बिना मानता मीरा री माँ
किण नै दरद बतावै ?
निज री जांघ उघाड़्यां निज नै
लाज घणैरी आवै,
जूझो, हक रै खातर, थे मत
मिनख जमारो हारो !
सूख्यां जावै बिना नेह आ
संजीवण री बूंटी,
थे कंचन रै मेहां भीजो
थांरी तिसणां झूठी,
उठो, ओळखो आपो थांरो
घणमोला मोट्यारो !
