भारत की संस्कृति के लिए... भाषा की उन्नति के लिए... साहित्य के प्रसार के लिए
कलो री कला / सतीश गोल्याण
Kavita Kosh से
चुगली करनी अेक अजब कला होवै
कईयां री कीं बात, मनड़ै नै मोवै
सबदां सागै ईसी जोड़ै सुर‘र ताल
कई घर चक दिया कलो काकी रा कमाल
जिकै घर पूगगी ओ कलो काकी
बठै न्यारो ई चूल्हा अर न्यारी ई चाकी
काकी जाणै सगळै बास री कहाणी
सोचां, आ काकी है कै आकाषवाणी
बां‘रै घरां सूं निकळती काकी बोली
पूछ‘र आई हूं बा‘रों हालचाल
घण्टै‘क पाछै बां’रै आंगणै, बाजै ई धमाळ
अेक दिन धापी आरी मोटोड़ी बीनणी
माथै खूब रंग चढ़ायो,
बे‘रो नीं कुणसो मंत्र हो, आथण ई डैणती
रो भोड, मतीरै दाईं फुड़वायौ
बै मीठी-मीठी सी बातां,
अर हाथां री अलबेली अदावां,
काकी आगे ई लादै चावै किन्नै ई जावां
धुन री पकी अर आपरै काम री ईमानदार
काकी कठै ई फेल कोनी होई, हो रिकॉर्ड स्यानदार।
