कवी ऐं अहसास / अर्जुन ‘शाद’
थी सघियो कीन बयान हुस्न जे रुख़सार संदो
मूं कयो ख़ूब तसव्वुर गुले गुलज़ार संदो
हर वर्क़ गुल जे खे मूं चोॼ मंझां हथु लाथो
थी सघे ॻिल जी नफ़ासत जो इएं मन काथो
चाह मां ख़ूब चयुमि शइर सना ख़वानीअ जा
हुस्न जा हक़ मगर मूंखां बजा कीन थिया!
थिए फ़क़्त हुन खे ॾिसण साणु थो जादू मूं ते
गुल त छा, कयो न असर गुल जी को ख़ुशबू मूं ते!
हुन जे स्पर्श में लिकल आहे छा! बिजलीअ जो असर
किअं फ़क़्त उन जे ख़यालनि में सघे पइजी ख़बर?
बिरहु दिल में थो छॾे न ॿारणु ॿारे
नीर नेणनि जो बि उन खे न सघे थो ठारे।
झीणो अवाज़ तो आहुनि जो ॿधो आहि कवी!
दिल जो तूफ़ान बि तो ताईं पुॻो आदि कवी
जेसीं ग़म खां न अखियुनि मां तुंहिंजे पाणी ईंदो
तेसीं दुख जो को सही ज़िक्र न तो खां थींदो
तो में दर्दनि जा अगर दूद दुखिया ई नाहिनि
तुंहिंजा ही जान जिगर ॾुख खां ॾुखिया ई नाहिनि
तुंहिंजी दिल खे जे कॾहिं लहस न आई हूंदी
चिणिग पो कहिड़ी तो गीतनि में समाई हूंदी?
कीन मज़राब संदी चोट सठी तुंहिंजी सितार
दिल जे तारुनि मां उथी ठेस बिना कहिड़ी पुकार?
रत कटोरे जे ॾियण खां पो रुखी रोटी नसीब
रुखी रोटी बि किथे, जे पवे बीमार गरीब?
अहिड़ी किस्मत जो कॾहिं तूं बि थियो आहीं शिकार?
तुंहिंजे सीने में का गु़रबत जी चुभी आहि कटार?
जेसीं तो ते बि टुटो नाहे मुसीबत जो पहाड़
तेसीं तुंहिंजो बि मूसिर न कॾहिं थींदो राड़
तो तसव्वुर में ई अहसास कयो दर्द संदो
दूरबीनीअ जे करे वहम थिए स्पर्श जी!
