भारत की संस्कृति के लिए... भाषा की उन्नति के लिए... साहित्य के प्रसार के लिए
पिया से कहबै / खुशीलाल मंजर
Kavita Kosh से
पिया सें कहवै हम्मू आय
नै गछबै हुनकऽ साय
जबेॅ सें ऐलाँ तोरा घरऽ में
कहियो नै दैखलाँ नजरी सुख
हरदम जी तेॅ छटपट करेॅ
दुखऽ पर छे लागले दुख
घरें बहारें कोय नैं बूझेॅ
तहूँ देखाय छेॅ हरदम सान
कत्तेॅ सहबै सब रऽ भिंसाड़ी
जीते जिनगी देबै परान
भाय भौजाय छऽ हमरऽ नैहराँ
कथीलेॅ होतऽ है रं बिवाद
जब तांय रहलाँ बाबू घरऽ मैं
कहियो नै देखलॉ मार फसाद
की जानौं की भूल चूक करलाँ
देवता देहरीं आय छी छछआय
पिया सें कहबै हम्मू आय
है सौख हमरा रहिये गेलऽ
हँसी हँसी करिय तोरा सें बात
दिनऽ राती हरदम कचकच
उठतें बैठतें होय छऽ कभात
चुपचाप रहऽ हमरा सामनां
कीं मरदौटी झाड़ै छऽ
आभियो तक ने बात दुहरैलिहौं
तहियो बाढ़नी झांटै छऽ
आबेॅ नैं सहबौं जे कुछ हअेॅ
है हिसखऽ तेॅ देबै छोड़ाय
पिया सें कहबै हम्मू आय
नैं गछबै हनकऽ साम
