भारत की संस्कृति के लिए... भाषा की उन्नति के लिए... साहित्य के प्रसार के लिए
प्रीत रो रंग / मदन गोपाल लढ़ा
Kavita Kosh से
आंख्यां माथै पावर वाळो चश्मो
लिलाड़ रै ऊपर सूं झांकती चांद
कानां सारकर चमकता धोळा बाळ
कमाई अर खरच रै हिंसाब में खपतो मगज
प्रीत रो कोई रंग कोनी परगासै।
नागण जैड़ै बाळां री घटती लम्बाई
बगत री खंख सूं पाकतो उणियारो
घर रै खोरसै में खटतो डील
टाबरा री टंडवाळी में अटक्योड़ो जीव
जीयाजूण री भाजा-न्हासी रा अैनाण तो मांडै
नायिका रो पड़बिम्ब कोनी दिखाळै।
कांई आपनैं दर में ई नीं दीस्यो प्रेम
परसेवो तो दीस्यो हुवैला पक्कायत
परसेवै में ई पळकै प्रीत रा रंग
परसेवै में ई पनपै प्रीत री बेल।
