मचलै फगुनमा / राजकुमार
बाबा ऐंगनमाँ में मचलै फगुनमाँ, सुनी ल सजना
जैभौं बाबा-एँगनमा, सुनी ल सजना
मचलोॅ छै धूम वहाँ, मचलै चरनमाँ, सुनी ल सजना
नहियें मानभौं कहनमाँ, सुनी ल सजना
जैभौं बाबा-ऐंगनमा सुनी ल सजना
सुनी ल सजनी, हमारोॅ मानोॅ कहनमाँ, सुनी ल सजनी
धुक्कड़ रं उड़ै वहाँ, लुक्कड़ पवनमाँ, सुनी ल सजनी
तोरोॅ कोंपल बदनमाँ, सुनी ल सजनी
हमरोॅ मानोॅ कहनमाँ, सुनी ल सजनी
सुनी ल सजना, नहियें मानभौं कहनमाँ, सुनी ल सजना
टहकै छै टेसूवन, लहकै चमनमाँ, सुनी ल सजना
मचलै महुआ मदनमाँ, सुनी ल सजना
जैभौं बाबा ऐंगनमाँ, सुनी ल सजना
सुनी ल सजनी, मानॉे-मानोॅ कहनमाँ, सुनी ल सजनी
मदिरैलोॅ मौसम रोॅ, अल्हड़ चलनमाँ, सुनी ल सजनी
तोरोॅ चंचल नयनमाँ, सुनी ल सजनी
मानोॅ-मानोॅ कहनमाँ, सुनी ल सजनी
सुनी ल सजना, हमरोॅ मानोॅ कहनमाँ, सुनी ल सजना
मोंजरैलोॅ धरती छै, गद्गद गगनमाँ, सुनी ल सजना
रस में बोरी ल मनमाँ, सुनी ल सजना
हमरोॅ मानोॅ कहनमाँ, सुनी ल सजना
खुललोॅ अकाशोॅ में खिललैं चनरमाँ सुनी ल सजना
मचलै मंदिर-भवनमाँ, सुनी ल सजना
मोहै धरती-गगनमाँ सुनी ल सजना
मचलै बाबा ऐंगनमाँ, सुनी ल सजना
सुनी ल सजनी, मानी लेलिहौं, कहनमाँ, सुनी ल सजनी
यति के भी, लगी गेलै, रति केरोॅ बनमाँ, चलोॅ हे सजनी
झूमी-झूमी ऐंगनमाँ, चलोॅ हेसजनी
चलोॅ बाबा ऐंगनमाँ, चलोॅ हे सजनी
बाबा ऐंगनमाँ में मचलै फगुनमाँ, सुनी ल सजना
जगलै फागुन महिनमाँ, पूरोॅ भेलै सपनमाँ, सुनी ल सजना
