भारत की संस्कृति के लिए... भाषा की उन्नति के लिए... साहित्य के प्रसार के लिए
मोनक हुलास / शम्भुनाथ मिश्र
Kavita Kosh से
भेल सोहाओन फागु हे प्रीतम घर अओता
सोलह सजब शृंगार हे प्रीतम घर अओता
छोड़ि पिया निज गेला विदेशे
फोनक टुनटुन हमर सनेसे
झुमत हमर मन आजु हे
प्रीतम घर अओता
अपनहिँ हाथेँ रंग लगायब
आनन्दक हम गंग नहायब
रूप निहारब आजु हे
प्रीतम घर अओता
संगहि रहि हम हृदय जुड़ायब
प्रेमक सागरमे डुबि जायब
विरहक स्नेह अपार हे,
प्रीतम घर अओता
प्रभुसँ विनती युग-युग जीबथु
प्रणयक रसकेँ पुनि-पुनि पीबथु
अचल रहय अहिबात हे,
प्रीतम घर अओता
