भारत की संस्कृति के लिए... भाषा की उन्नति के लिए... साहित्य के प्रसार के लिए
वसन्त के बारात / ऋतु रूप / चन्द्रप्रकाश जगप्रिय
Kavita Kosh से
जैना शिशिर के जाय के ताकोॅ मेॅ
बैठलोॅ रहेॅ उल्लास के संगीत
आरो शिशिर की गेलै
सबसेॅ पहिलेॅ सुग्गैं देलकै सनेश
वसन्त के आवे के
खोड़र मेॅ बैठी केॅ नै
धरती आरो सरंग के बीच
आपनोॅ संगीत गुंजैतेॅ हुएॅ
टें, टें, टें।
तबेॅ चुप केना बैठतियै मैना
अपनोॅ महीन आवाज सेॅ
गाँव-गाँव केॅ बताय देलकै
वसन्त बारात लैकेॅ आवी रहलोॅ छै।
ई सुनी केॅ पपीहौं कहलकैं ‘हों’
हारिलो कहलकै ‘हों’
आरो जानेॅ कहाँ नुकेलोॅ
भौरौं कहलकै-
झुट्ठे बात थोड़े छेकै
बसन्त बारात लै केॅ
आवी नै रहलोॅ छै,
बारात तेॅ द्वार लागी गेलोॅ छै।
