भारत की संस्कृति के लिए... भाषा की उन्नति के लिए... साहित्य के प्रसार के लिए
श्रावणी / कालीकान्त झा ‘बूच’
Kavita Kosh से
आशवर शीघ्र श्रावण मे औता पिया
प्यास पर नीर पावन बहौता पिया
देखि हुनका सुखक मारि सहि ने सकब,
खसि पड़ब द्वारि पर ठाढ़ रहि ने सकब
पाशतर थीर छाती लगौता पिया,
प्यास पर नीर पावन बहौता पिया
भऽ उमंगित बहत आड़नक बात ई,
उल्लसित भऽ रहत चाननक गात ई
पाततर पिक बनल स्वर सुनौता पिया,
प्यास पर नीर पावन बहौता पिया
मन उमड़ि गेल बनि गेल यमुना नदी,
तन सिहरि गेल जहिना कदंबक कली
श्वास पर धीर बंसुरी बजौता पिया,
प्यास पर नीर पावन बहौता पिया
