सैंतालिस की आजादी / रणवीर सिंह दहिया
पन्द्रा अगस्त सैंतालिस का दिन लाखां ज्यान खपा कै आया।।
घसे हुये कुर्बान देस पै जिब आजादी का राह पाया।।
1
सैंतालिस की आजादी पाछै दो हजार आ लिया
बस का भाड़ा याद करो आज कड़ै जा लिया
सीमेंट का कट्टा कितने का आज कौणसे भा लिया
एक गिहूं बोरी दे कै सीमेंट हमने कितना पा लिया
चिन्ता नै घेर लिये जिब लेखा-जोखा आज लगाया।।
2
आबादी बधी दोगणी पर नाज चौगुणा पैदा करया
पचास मैं थी जो हालत उसमैं बताओ के जोड़ धरया
बिना पढ़ाई दवाई खजाना सरकारी हमनै रोज भरया
ईमानदारी की करी कमाई फेर बी हमनै कड़ै सरया
भ्रष्टाचार बेइमानी नै क्यों सतरंगा जाल बिछाया।।
3
यो दिन देखण नै के भगत सिंह नै फांसी पाई थी
यो दिन देखण नै के सुभाष बोस नै फौज बनाई थी
यो दिन देखण नै के गांधी बापू नै गोली खाई थी
यो दिन देखण नै के अम्बेडकर संविधान बनाई थी
नये-नये घोटाले सुणकै यो मेरा सिर चकराया।।
4
आजादी दिवस पै कसम उठावां नया हरियाणा बणावांगे
भगत सिंह का सपना अधूरा उनै पूरा कर दिखावांगे
ना हो लूट खसोट देस मैं घर-घर अलख जगावांगे
या दुनिया घणी सुन्दर होज्या मिलकै हांगा लगावांगे
रणबीर सिंह मिलकै सोचां गया बख्त किसकै थ्याया।।
