भारत की संस्कृति के लिए... भाषा की उन्नति के लिए... साहित्य के प्रसार के लिए
हामीलाई निर्धो नसम्झ / हरिभक्त कटुवाल
Kavita Kosh से
यो देशको माटोले भन्छ
यो देशको ढुङ्गाले भन्छ
हाम्रो पनि रातो रगत यहीँ बगेको छ
हाम्रो पनि तातो पसिना यहीँ खरेको छ ।
हाम्रा गोठाला दाज्यैले यहीँको वन र पाखामा
मनको बह पोखेमा छन् सालैजूको आखामा
हाम्री खेताल्नी दिदीले छातीको माया सिँचेर
यहीँको खेत रोपेकी छन् भोक र तिर्खा बिर्सेर ।
पहाड-पर्वत त्यही भन्छन्
खोला र नाला त्यही भन्छन्
हाम्रो पनि रातो रगत यहीँ खसेको छ ।
हाम्रो पनि तातो पसिना यहीँ खसेको छ ।
हामीलाई निर्धो नसम्झ पहाड कहिल्यै झुक्दैन
छातीमा आँट-सागर कहिल्यै सुक्दैन
देशका लागि मरेको जून र घाम साक्षी छन्
हामीले के पो गरेनौँ, के गर्न अझ बाँकी छ ?
आकाश आज त्यही भन्छ
बतास आज त्यही भन्छ
हाम्रो पनि रातो रगत यहीँ बगेको छ
हाम्रो पनि तातो पसिना यहीँ खसेको छ ।
