अठै स्यूं देख / प्रमोद कुमार शर्मा

देख
दूर-दूर
आंख री सींवा तांई देख!
देख:
कितरा मिन्दर
कितरी मैं'जद
कितरा गुरद्ववारा
कितरा चरच
मून खड़या
देखै है आदमी रा पाप
अठै स्यूं देख
खिड़की खोल!
मां री कोख स्यूं देख
दूर-दूर
आंख री सींवा पार
आदमी ई आदमी
एकसा नाक
एकसा कान
एकसा पैरान!

फेर बी
लड़-लड़ मरै है
कोई किणी री
लिहाज कणा करै है!
तो पूछ!
आपू-आप स्यूं पूछ
कुण दे दिया ओ सराप!
देख:
दूर-दूर
आंख री हदां सरहदां पार!