भारत की संस्कृति के लिए... भाषा की उन्नति के लिए... साहित्य के प्रसार के लिए
ई देश हमर ओकरे / नरेश कुमार विकल
Kavita Kosh से
सशुल्क योगदानकर्ता ३ (चर्चा | योगदान) द्वारा परिवर्तित 23:58, 22 अप्रैल 2015 का अवतरण ('{{KKGlobal}} {{KKRachna |रचनाकार=नरेश कुमार विकल |संग्रह=अरिपन / नर...' के साथ नया पृष्ठ बनाया)
ई देश हमर ओकरे जकरा
हाथक कलम करूआरि छै।
एक हाथ मे फूल अमन केर
दोसर मे तरूआरि छै।
टुटल मरइया गाबि रहल छै
ताजमहल केर तान पर
मुदा प्राण केर बलि चढ़ाबय,
सदिखन अपन आन पर
दोस्तक लेल शीतल समीर
आ‘ दुश्मन लेल बिहाड़ि छै।
एक हाथ मे फूल अमन केर
दोसर मे तरूआरि छै।।
एखनो उगथि सुरूज नित दिन
पूर्वांचल केर कोर मे
सीता केर इतिहास लिखल अछि
डूबल हुनके नोर मे।
लक्ष्मीबाई एहेन कतेको
भरल देश मे नारि छै।
एक हाथ मे फूल अमन केर
दोसर मे तरूआरि छै।।
घऽर अजन्ता गाम एलोरा
विद्यापति केर गीत छै,
बाला केर गर्दनि मे शोभै
सरिसों फूलक पीत छै।
सुतल समुन्दर मे एखनो फेर
उठल बड़का जुआरि छै।
एक हाथ मे फूल अमन केर
दोसर मे तरूआरि छै।।
