"नेपाली कहाँ गयो हाम्रो गीत / धर्मराज थापा" के अवतरणों में अंतर

नेपाली कहाँ गयो हाम्रो गीत यसै हरायो ।
पहरा नै थर्काउने हाम्रो मीठो गान
विश्व-दिल फर्काउने हाम्रो ठूलो शान
नमिल्काऊ धूलामाथि नेपालका राजा !
दिलसंग दिल जोरी अघि लागौं बाबा !
              हामीलाई कर्महारा कल्ले बनायो !

छायामनि सुसेलीमा नगाएको हैन
दर्द पोखी सारंगीमा नरोएको हैन
मागी खान कल्ले पार्‍यो यो नेपालीलाई
नेपाल नै मेरो भन्छ पाखाकोले आई
              अनारकली आयो भन्दै ढ्वाङ करायो
              हाम्रो गीत यसै हरायो ।

दुइ बार जर्मनसित नलडेको हैन
सतलज र काँगडा नलिएको हैन
संसारको अग्लो घूरी नचढेको हैन
हरुवा भै यो नेपाली फर्किएको छैन
              जति बुझ्यो उति किन आज डरायो।

डेढकोटि आशा-फूल यसमा झुम्नुपर्छ
डेढकोटि भैगो सानो छाती फुल्नुपर्छ
नेपालीको नौलो बोलीको यो नौलो भाषा
मन्दिर नै बन्यो भने होला देश खासा
गुहार माग्‌दै पिल्सिएको प्राण करायो
हाम्रो गीत यसै हरायो ।


.............................
राष्ट्रिय भावना-बाट, २०११