बाज–चरा / प्रोल्लास सिन्धुलीय
चरा स्वतन्त्र थियो
चराको अनुहारमा
कुनै माओत्सेतुङहरू थिएनन्
कुनै कार्ल माक्र्स
भ्लादिमिर इल्यिच लेनिन
अथवा
फ्रेडरिक एङ्गेल्सहरू थिएनन्
चरासँग
नीलो सपना चिथोरेर उग्राउने
राता महत्त्वाकाङ्क्षाहरू थिएनन् ।
अकस्मात् चरा पक्राउ प¥यो
सुरक्षाको
कथित पर्खाल नाघेर
चारा खोज्न निस्कनुको अपराधमा
उसका प्वाँखहरू उखेलिए
मांसपिण्ड समान भएपछि
चराको अवशेषलाई
भान्सागृहमा प्रयोग गर्ने आदेश दिइयो ।
बाजद्वारा सताइएको सानो चरा
स्वयम्
बाज घोषित भयो ।
यता बाजै भनेर उसको सद्गति गरियो
उता बाजै भनेर
उसलाई सहिद घोषित गरियो
चरा रातारात अमर भयो
चरा
मृत्युपश्चात् अमर भयो ।
चरा स्वतन्त्र थियो
चरासँग
कुनै कार्ल माक्र्स
भ्लादिमिर इल्यिच लेनिन
अथवा
फ्रेडरिक एङ्गेल्सका छायाँहरू थिएनन्
चरासँग
रातो नदीमा हाम्फालेका
शाकाहारी महत्त्वाकाङ्क्षाहरू थिएनन् ।
चरा स्वतन्त्र थियो
मृत्युपछि पनि कोही
स्वतन्त्र हुँदारहेछन् ।
