भारत की संस्कृति के लिए... भाषा की उन्नति के लिए... साहित्य के प्रसार के लिए
मेरो जोबन लैजाऊ / गोपाल योञ्जन
Kavita Kosh से
केटा – मेरो जोबन लैजाऊ
केटी – पर्दैन, त्यो दुई दिनको
केटा – मेरो ज्यान लैजाऊ
केटी – चाहिँदैन, त्यो माटोको
केटा – मेरो माया लैजाऊ
केटी –
हुन्छ, यदि त्यो पुरानो हुन्न भने
पछि गई फेरि त्यो कहिल्यै छिन्दैन भने
केटा –
मेरो आँखाको नानीमा तिमी छाएकी छ्यौ
मेरो हृदय भावनामा तिमी आएकी छ्यौ
के पो दिन सक्छु अरू म तिमीलाई
जब सम्पूर्ण मलाई नै पाएकी छ्यौ
त्यतिले पनि तिम्रो मन भरिन्न भने
मेरो आँखा लैजाऊ
केटी – पर्दैन, त्यो लोभ हो
केटा – मेरो ओठ लैजाऊ
केटी – पर्दैन, त्यो मोह हो
केटा – मेरो बचन लैजाऊ
केटी –
हुन्छ, यदि त्यो कहिल्यै तोडिन्न भने
पछि गई फेरि ऋतु झैँ फेरिन्न भने
