अजनबी / कृशिन राही
मां हिन शहर में नओं नाहियां
पोइ बि अजनबी आहियां।
जेको कुझु पातो, ॼातो, सुञातो अथमि
हिते, हिन शहर में
सो सभु कुझु विञायो ऐं विसारियो अथमि
हिते, हिन ई शहर में;
ऐं अजु हिते, हिन पंहिंजे शहर में
नओं न हून्दे बि नओं आहियां!
अजनबी आहियां!
दोस्त आहिनि, मिट माइट आहिनि
मगर उन्हनि सां मिलणु गॾिजणु
हिते न, कंहिं ॿिए हंधि
अक्सर कंहिं ॿिए शहर में थीन्दो आहे!
हू ऐं मां
हिति पंहिंजे शहर में परावा आहियूं!
ऐं
हुति पराए शहर में पंहिंजा आहियूं!
पंहिंजो पंहिंजो नाहे
मुंहिंजो मुंहिंजो नाहे
टंगूं? आहिनि;
तरह तरह जे क्यू में बीहण लाइ आहिनि!
ॿांहूं? आहिनि;
बस या ट्रेन खे पकिड़ण
ऐं उन में लटिकण लाइ आहिनि
आखियूं? आहिनि;
महिने में हिकु दफ़ो, पहिरीं तारीख़
पंहिंजी पघार खे
पराई अमानत जियां ॾिसण लाइ आहिनि!
चेहरो बि आहे!
मुख़्तलिफ़ भाव सां ‘मेक-अप’ थियल
नक़ाब पाइण लाइ
ऐं बाक़ी जिस्मु?
उमिरि जी गंढि गंढि नोड़ीअ ते
ज़िसम जो अधोराणो वॻो
कंहिं विसिरी वियल लटे जियां
टंगियो पियो आहे
बरसात में भिॼे पियो!
उस में सुके पियो!
इन्हनि सभिनी में वंडियलु विरहायलु
टुकरा अफकरा थियलु अजनबी
मां आहियां,
आहियां खां वधीक नाहियां।
