अमन जी दावत / गोवर्धन भारती
अञा ताईं
असां जा रूह टुकरा थी
टिड़िया पखिड़िया पिया आहिनि
असांजे मेज़बाननि जे मेज़पोशनि ते!
असीं आयल हुआसीं अमन जे सॾ ते!!
मिलियासीं ख़ूब खीकारे
झुलियासीं हथ हथनि में
सीनो सीने मां लॻायोसीं,
मजे़ सां पेग पीतासीं
न टुटन्दड़ दोस्तीअ जो दमु भरियोसीं
ऐं-
कयासीं आलमी इमदाद जा
ऐं भाइपीअ जा उहिद ऐं इक़रार
हर इनसान खे ईसा बणाइण लइ!
चयो सभिनी-असांखे अमन घुरिजे
अमन घुरिजे
अमर घुरिजे!
अजबु आहे!!-
अचानक-
अमन जे ई फ़िकिर में
वीचार सभिनी जा तिखा हथियार बणिजी पिया
सिधा सादा मुलायम लफ़्ज़ भी
तलवार बणिजी पिया!
मगर कांटनि, छुरियुनि, तोंड़े प्लेटुनि ते
ज़रो भी दागु़ नाहे
(जो असांजो ख़ूनु पाणी थी चुको आहे)
असां जा जिस्म पिणि आहिनि सलामत
(जो उन्हनि ते ढोंग जो बख़्तर चढ़ियलु आहे)
असां जा रूह, टुकरा थी
टिड़िया पखिड़िया पिया आहिनि
असांजे मेज़बाननि जे मेज़पोशनि ते!
(2.9.1978)
