आकाश बग्छ निलिमाले धर्ती बग्छ जलले / मञ्जुल

नदी

आकाश बग्छ निलिमाले धर्ती बग्छ जलले
सारा सृष्टि गतिशील छ करूणाकै बलले

तिम्रो दुःख सधैँ मलाई दुःखै भएको छ
तिम्रो पीडा सधैँ मलाई पीडै भएको छ
देखिनौ र तिमी रुँदा कस्तो गरी रोएँ
तिम्रा अश्रुधारले भिजी कस्तो पीडित भएँ

त्यस्तै त हो तिम्रो माया सधैँ मेरो शक्ति
तिम्रो सुख, तिम्रो शान्ति सधैँ मेरो प्राप्ति
ग'को छैन कहीँ टाढा छाडी तिमीलाई
बगिरेछु टेकी सधैँ एउटै जिमीलाई ।