भारत की संस्कृति के लिए... भाषा की उन्नति के लिए... साहित्य के प्रसार के लिए
आपां होवां अेक / दीनदयाल शर्मा
Kavita Kosh से
आओ आपां
मायड़ भासा
राजस्थानी में
चोखी-चोखी
रचनावां लिखां
अळगी-अळगी
विधा में
नूंवैं सूं नूंवैं
ढंग में लिखां
पछै
सगळी भासावां में
आपां
सै' सूं मोटा दिखां।
आपां
आम आदमी नै बतावां
उणनै मानता री
बात समझावां
आम आदमी कन्नै
नीं है नेट
बीं रौ
खाली पड़्यौ है पेट
आपां
पेट री बात करां
आपां दु:ख बांटण री
बात करां
आपां घर में बात करां
पाड़ौसी सूं बात करां
गळी मौहल्लै बात करां
आपां सै' सूं बात करां
मानता सारू
आम आदमी है धूरी
इणनै जोडऩौ
भौत ही है जरूरी
आम आदमी
दिरावै 'हार'
आम आदमी
परावै 'हार'
आम आदमी
आपां नै
सै' सूं अळगा मानै
पैली ओ भेद मिटावां
पछै भासा माथै आवां
आपां होवां अेक
आपां नै कुण टोक सी
मानता देणी पड़सी
पछै कुण रोक सी।
