भारत की संस्कृति के लिए... भाषा की उन्नति के लिए... साहित्य के प्रसार के लिए
इतियास रो बास / मदन गोपाल लढ़ा
Kavita Kosh से
ओळूं रै किवाड़ां आडी
अटकायोड़ी है
उडीक री आगळ
जकां नैं ओढाळ्यां पछै
अजै लग नीं खटखटायो किणी
जुगां सूं
मानवी परस सारू तरसै
किवाड़ां रो काठ
घड़्यां पछै जकां नैं
खाती ई बिसरग्यो
आखी उमर छोल'र
सूत-सूत जोख'र
सिरज्योड़ी पंचमेळी जोड़ी
गवाड़ रै बिचाळै थरप्योड़ी
पूतळी रै उनमान
थिर ऊभी है
जिणरै ओळै-दोळै
कोनी दीसै कोई जीव-जिनावर
साव मून
फ गत बायरै री सूं-सांट
भांगै सूनेड़।
आप फगत देख सको आं किवाड़ां नैं
जिणरै कड़्यां-कूंटां माथै
जम्योड़ी है बगत री खंख
चीकणास अर मैल सूं
काळूंठो पड़ग्यो आं रो रंग
खड़को कर्यां किसा
खुल सकैला
जंग लाग्योड़ा बोदा कबजा...
चेतो-
आं किवाड़ां रै पाछळ
इतियास रो बास है।
