भारत की संस्कृति के लिए... भाषा की उन्नति के लिए... साहित्य के प्रसार के लिए
उनका से सट जइहें / सतीश मिश्रा
Kavita Kosh से
सोने चोंच मढैबउ सुगना उनकर अँगना जो!
हमरे किरिआ, हमरे आँखे टुसुर-टुसुर जा रो!
एतना रो कि तोर लोर उनकर मन-खेत पटा दे
हमर प्रेम के पसरे पौधा, खेर-पोआर हटा दे
हम्मर-उनकर मिलन करा के दूध-मलइया खो!
हमरे किरिआ, हमरे आँखे टुसुर-टुसुर जा रो!
जैबे तखनी अगर नींद में होएता, तो न जगइहें
का जानीं हमरे सपना में होएता, तूँ रुक जइहें
मगर तबीयत नीक-जबुन बुझ लीहें माथा टो!
हमरे किरिआ, हमरे आँखे टुसुर-टुसुर जा रो!
अपन पाँख के हम्मर अंगुरी थोड़े देर समझ के
सुघरइहें तूँ देह समुच्चे जहाँ-तहाँ बझ-बझ के
लोरे-झोरे पलक देखइहें, पलक उठौतन तो!
हमरे किरिआ, हमरे आँखे टुसुर-टुसुर जा रो!
कारन बतवे में रोवे के, फूँट निअन फट जइहें
अपन देह के हम्मर समझित उनका से सट जइहें
अफर के कहिहें-‘अरे बेदरदी! अब तो घरवा जो!’
हमरे किरिआ, हमरे आँखे टुसुर-टुसुर जा रो!
