ओळयां अर आंधी / संजय पुरोहित
सैर में आज आंधी
भळै खिंडायगी
च्यारूं मेर ओळ्यां
म्हारै गांव री
बाबो सा रै हुक्कै सूं
धूंएं ज्यूं निसरतो बादळ
दादो सा सूं
खेलतो लुकमीचणीं
बाऊ जी री बीड़ी सूं
निकळतो छल्लो गोळमटोळ
मा सा रै चूल्है सूं
डागळै रै पगोथियां चढतो
कदैई
बळदियां रै खुरां
उडतो खिंडतो धूळो
इस्कूल सूं घरां आंवतो
धूळ सूं भरीज्योड़ो
छोटकियो बीरो
कणै ई न्हानकी रै मुंडै
धोबो भर‘र भतूळियो
काकै रै गोडां हिंडोळिया पाडोळिया करतो छोटियो
जूनीं घट्टी घरर-घरर कर
बब्बर सेर ज्यूं डरांवती
माथै में घणकस रो
तेल पाय
म्हारै बाळां सूं खींच ताण कर‘र
रातो रीबनियों घाल‘र
चोट्यां करती काकी
ओळ्यां आंख्यां आल्ली करै।
हां हां
दिखणादै बसे म्हारो गांव
म्हारो नीं है
म्हारी आंगळ्यां सूं
गोबर नीप्योड़ी भींतां माथै
मांड्योड़ा मांडणां
होयग्या होवैला फीका
पण म्हारै अंतस में
मंड्योड़ो गांव
सांतरो ई खड़यो
म्हैं कांई करूं, बाबोसा परणाई दूर
मोकळी दूर सैर में
अर म्हैं बांधली पाळ
सनेसै अर कागद सूं
आज पण धूळो इण आंधी रो
पैर‘र गाभा
बींरै री ओढणीं ज्यूं
बरस-बरस ल्यावै लगोलग
ओळ्यां म्हारै गांव री कदैई ना रूठै राम
क्यूं फेर चिड़ी दाणियां नै तरसै
जे इन्दर धाप-धाप लगोलग बरसै।
