भारत की संस्कृति के लिए... भाषा की उन्नति के लिए... साहित्य के प्रसार के लिए
कदैई पाणी में गळां भायला / सांवर दइया
Kavita Kosh से
कदैई पाणी में गळां भायला
कदैई तावडै में बळां भायला
देख तूं बगत आयो इण हद भूंडो
खुद रै सामेळै सूं टळां भायला
है हेताळू पण स्सै छिपला खावै
खुद रो जी तीसूं दिन तळां भायला
धूवों तो हुवणो ई है चौफेर
छाणै दांई धुख धुख बळां भायला
म्हांरी सांस हुई म्हांनै ई भारी
जग सागै खुद नै खुद खळां भायला
