भारत की संस्कृति के लिए... भाषा की उन्नति के लिए... साहित्य के प्रसार के लिए
के छेलै बैठां हमें केकरा पुकारी एतियै / अमरेन्द्र
Kavita Kosh से
के छेलै बैठां हमें केकरा पुकारी एतियै
मिलतियै कोय्यो तेॅ है दिल केॅ ही हारी एतियै
आयकोॅ रात कना साथ गुजारी एतियै
मौत की नींद छेलै जेकराकि टारी एतियै
चौकड़ी भरतै हिरन आरो खुला जंगल में
बाघ नहियो जों अगर एतियै शिकारी एतियै
बोरी देतियै ई कही-लोग किनारा में डुबै
तैरी तैरी जो केन्हौं हम्में किनारी एतियै
जिन्दगी कत्तेॅ बिखरलोॅ उजड़लोॅ लागै छै
मौत के आबै सें पैहलें ई सम्हारी एतियै
देवता दम तोड़ी चुकलोॅ छै मनीरोॅ में मतुर
बैठलोॅ भक्त छै आशा में पुजारी एतियै
सबकेॅ मालूम तबेॅ होतियै की गजल होय छै
एकको बेरिया अगर अमरेन्द्र के पारी एतियै
-30.9.91
