भारत की संस्कृति के लिए... भाषा की उन्नति के लिए... साहित्य के प्रसार के लिए
कोजा दिन / निशान्त
Kavita Kosh से
अेक
बिना मेह आळा
अै आसाढ रा दिन
कित्ता कोजा है
सूरज दिनूंगै सूं लैय'र
रात तांई
बरसाव आग
कदे-कदे चढ ज्यावै
गर्द अकास
अर दिन उगण -छिपण रो भी
ठा नीं चालै
गर्द हरेक जिग्यां
जम ज्यावै
बापड़ी लुगायां
सारै दिन हटावै
अेक नीं
दो नीं
पन्द्रह दिन होग्या
आं दिनां नै
इकलार
पैल दिन स्यूं
अगलो दिन
भैड़ो निकळै
अै दिन ईं मायनै में भी
कोजा है कै
आं दिनां मांय
आं दिना नै
काटण रै सिवा
और कीं नीं सूझै ।
दो
आजकल
म्हारी उम्मीदां पर
पाणी नीं
रेत अर आग फिरै
जकी रोज
आभै स्यूं गिरै ।
