भारत की संस्कृति के लिए... भाषा की उन्नति के लिए... साहित्य के प्रसार के लिए
गमागम ऐंगना / त्रिलोकीनाथ दिवाकर
Kavita Kosh से
गोड़ बजड़ै छै धमाधम ऐंगना
ढोल बाजै छै ढमाढ़म ऐंगना
लाल कुरती में खिलै छै सजनियाँ
मूय चमकै छै जनां कि चननियाँ
बाल गजरा से गमागम ऐंगना
ढोल बाजै छै ढमाढ़म ऐंगना।
ताल झूमर संग भूलै पहरिया
सब सहेली संग लचकै कमरिया
देह घामों से चमाचम ऐंगना
ढोल बाजै छै ढमाढ़म ऐंगना।
मोन हरसै आय देखी सवँरिया
हाथ मांगै भाय छेकी दुअरिया
प्रेम बरसै छै झमाझम ऐंगना
ढोल बाजै छै ढमाढ़म ऐंगना
