भारत की संस्कृति के लिए... भाषा की उन्नति के लिए... साहित्य के प्रसार के लिए
गीत चिड़कल्यां / कन्हैया लाल सेठिया
Kavita Kosh से
मुगती मिलसी पछै जीवड़ा
पैली बंधणो पड़सी।
लट्टू नै गत मिली पड़ी जद
जा गळबाथ्यां जाळी,
बाण अकासां पूग्यो जद आ
चिमठी चोटी झाली,
कंवळ बणै बो, कंठा तांई
मझ कादै में रहसी।
मुगती मिलसी पछै जीवड़ा
पैली बंधणो पड़सी।
जोत पकड़ में आ बाती री
सूरज स्यूं जा मिलगी,
लौ नै छोड़ जकी चिणगारी
चाली बा ही रूळगी,
घड़ो बणै बो, गळ फांसी खा-
आंधै कुवै उसरसी-
मुगती मिलसी पछै जीवड़ा
पैली बंधणो पड़सी।
बैठ्यो नीर हिंयाळै माथै
पाछौ समदां आवै,
मरजादां में बंध्या बिना कुण
सुरगां नेड़ो जावै ?
गीत चिड़कल्यां सुर री सांकल
थां नै पहरयां सरसी।
मुगती मिलसी पछै जीवड़ा
पैली बंधणो पड़सी।
