गोपी बिरह(राग गौरी) / तुलसीदास
गोपी बिरह(राग गौरी)
()
सुनत कुलिस सम बचन तिहारे ।
चित दै मधुप! सुनहु सोइ कारन,
जाते जात न प्रान हमारे।।
ग्यान कृपान समान लगत उर,
बिरहत छिन-छिन होत निनारे।
अवधि जरा जोरति हठि पुनि-पुनि,
याते रहत सहत दुख भारे।2।
पावक बिरह, समीर स्वास,
तनु तूल, मिले तुम जारनिहारे।
तिन्हहि निदरि अपने हित कारन,
राखत नयन निपुन रखवारे।3।
जीवन कठिन , मरन की यह गति,
दुसह बिपति ब्रजनाथ निवारे।
तुलसिदास यह दसा जानि जियँ
उचित होइ सो कहौ अलि!प्यारे।4।
()
छपद ! सुनहु बर बचन हमारे।
बिनु ब्रजनाथ ताप नयननि को,
कौन हरे , हरि अंतर कारे।1।
कनक कुंभ भरि -भरि पियूष जल,
बरषत जलद कलप सत हारे।
कदलि, सीप, चातक को कारज
स्वाति बारि बिनु कोउ न सँवारे।2।
सब अँग रूचिर किसोर स्यामधन ,
जेहिं हदि जलज बसत हरि प्यारे।
तेहिं उर क्यों समात बिराट बपु
स्यों महि सरित सिंधु गिरि भारे।3।
बढ्यो प्रेम अति प्रलय के बर ज्यों
बिपुल जोग जल बोरि न पारे।।
तुलसिदास ब्रज बनितनि को ब्रत
समरथ को करि जतन निवारे।4।
