भारत की संस्कृति के लिए... भाषा की उन्नति के लिए... साहित्य के प्रसार के लिए
जरा-जरा सन बात पर आबेॅ सवाल हुवेॅ लागलै / दिनेश बाबा
Kavita Kosh से
जरा-जरा सन बात पर आबेॅ सवाल हुवेॅ लागलै
बिन बोलला पर भी तेॅ एन्हौं बबाल हुवेॅ लागलै
बड़ा अजब छै चलन यहाँकरोॅ खून गरम छै सबके
मर्डर जैसनोॅ चीज यहाँ भर साल हुवेॅ लागलै
यहाँ सब्भे के सिर पर जेकरोॅ भूत चढ़ी बोलै छै
हक में होकरोॅ आबेॅ बड़ा कमाल हुवेॅ लागलै
इंसानोॅ के धरम तेॅ छै कि चुप करी घरोॅ में बैठोॅ
सज्जन जैसनोॅ लोगोॅ के तेॅ अकाल हुवेॅ लागलै
बड़ा अजूबा खेल सियासत के देखै लेॅ मिलथौं
लगै छै बुद्धिये सें सब पैमाल हुवेॅ लागलै
बँटी गेलोॅ छै दू भागोॅ में अब बिहार के ताकत
बन्दरबाँट में नेता आबेॅ दलाल हुवेॅ लागलै
बखरा करी के सूबा, मन्सूबा बान्हलेॅ छै सबनें
नया औफिसर ‘बाबा’ देखोॅ बहाल हुवेॅ लागलै।
