जलन्दड़ घर ॿाहिरां / वासदेव मोही
ॿाकारूं-
गॾियल मिसियल, औरत मर्द ॿारनि जूं
जिअं पोइ तिअं
वधंदियूं वेयूं।
अंबोहु बुधन्दो रहियो।
उन्हनि बि बुधियूं पिए
जिनि खे बुधणु खपंदियूं हुयूं।
बाहि घर जे हिक हिस्से खां
ॿियनि हिस्सनि में डोड़न्दी वेई।
अंबोहु ॾिसन्दो रहियो
उहे बि ॾिसन्दा रहिया
जिनि खे ॾिसणु खपंदो हो।
कविता चुप बीठी रही
कविता
फ़िल्मी हीरो त नाहे
जो उॾामी मकान अन्दर वञी
जलन्दड़ शरीरनि खे ॿाहिर ढोए अचे
बचाए वठे!
कविता
पोलीसमैन बि नाहे
जो बाहि ॾीन्दड़नि खे
हथकड़ियूं लॻाए
जेलु कराए।
कविता!
तो वटि हथियार छो न आहिनि?
तूं लफ़्ज़ बि भुणभुणिया थी रखीं
जे गंबोड़ में गुम आहिनि।
कविता!
तो वटि चीख़ आहे
सन्ही, पर तिखी
जे तूं करीं!
सुभाणे, ही सभु जा सभु
अख़बारी अंग में तब्दील थी वेन्दा
पर अंग में
बाहि विसाइण,
बाहि खां बचण जी
नाकाम कोशिश कन्दड़
रख थी वियल
पितिकिड़ा पितिकिड़ा हथ
न ॾिसिबा
शरीर जे हर हिस्से खे हथ बणाए
बाहि मथां बालटियूं हारीन्दड़
कंहिं मर्द जा वेचारा हथ
न उभिरन्दा
कंहिं औरत जूं
मूर्छित अखियूं नज़र न ईंदियूं
के कराह बणिजी
भितियुनि जे दराज़ुनि में फासी पियल
के दरनि-दरियुनि जे चीरुनि मां
छुटी निकितल दांहूं
न बुधिबियूं
जल्द ई सन्नाटो छांइजी वेन्दो
समाधीअ जहिड़ो
कविता!
हाणे बि वक़्त आहे
चीख़ ई सहीं
करे छॾि!!
