डर सूं डरो तो दुनियां मारै / मोहम्मद सद्दीक

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

मोहम्मद सद्दीक » अंतस तास »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

डर सूं डरो तो दुनियां मारै
डर सूं डरपणियो मन हारै
डरतो मिनख मिनख रै लारै
नैया कुणसो पार उतारै।

दै गोतो डर भागसी
बतळाया डर जागसी
बुचकारयां डर लागसी
मिसरी मूंडै लाड लडायां
बिन फागण भी फागसी
खुल्ली गोळ्यां दागसी

थारी करणी रो फळ पा रै
माथै चढिया किणनै धारै
रूपां रूड़ो आंख्यां झारै
नैया कुणसी पार उतारै।

फाटी गुदड़ी सीणो है
खारा तूम्बा पीणो है
है मरणो पण जीणो है
डर डांफर बण गांव उजाड़ै
कायर जूण चबीणो है
नाव डूबसी तीणो है।
डर मत, गीत हेत रा गा रै
सगळा केवै कोनी ठा रै
भूखा भूत लागरया लारै
नैया कुणसो पार उतारै

हिम्मत रै फळ लागसी
डर भी डरतो भागसी
सूतोड़ा अब जागसी

हाणो-हाण थड़ी कर जूझै
अब समदर नै थागसी
करमां रै फळ लागसी

जग-मग जोतां नै मत मारै
काची कूंपळ नै मत खा रै
टाबर रोतां नै बिलमा रै
नैया कुणसो पार उतारै।