भारत की संस्कृति के लिए... भाषा की उन्नति के लिए... साहित्य के प्रसार के लिए
तुमारा बाना / ओम बधानी
Kavita Kosh से
अपड़ौ कि गाळी विराणौ कि छुईं
खैनि तुमारा बाना ,सूणि तुमारा बाना
कुटम्यौं कि रीस मुल्क क बोल
सैनि तुमारा बाना,सुणी तुमारा बाना
स्यूंद पाटी सजाई,नथुलि बिंदुली पैर्यालि
बिन फेरौं सात जन्मू कु ,नातू जोड़्यालि
सजीलि गाणी,सुखीलि स्याणी
सजै तुमारा बाना,कैनि तुमारा बाना
दुन्यां प्रीत की सजैक, हिया को घर बणैक
रखलु लुकैक छिपैक, ज्यू पराण बणैक
सजीलि दुन्यां,सुखीला सुपन्यां
सजै तुमारा बाना,देख्या तुमारा बाना
हैंसि हमेसा रहो, दुख दिख्यौ न सुण्यौ
माया की डाळि हो, छैलु सबुक खत्यौ
माया कि डाळि,सुपन्यौं कि माळा
लगै तुमारा बाना ,गंठ्यै तुमारा बाना
