दुखित आमा / गाब्रिएला मिस्ट्रल / सुमन पोखरेल

सुत मेरो प्यारो, सुत !
निश्चिन्त सुत।
मेरो मन नसुते पनि
मैले थकाइ नमारे पनि
तिमी नडराई सुत।

निदाऊ, निदाऊ!
रातमा तिमी चटपटाउँदाका आवाजहरू
दुबोका मुनाका सुसेलीभन्दा मृदुल होउन्
रेसमी भुवाका कम्पनभन्दा मधुर होउन्।

मेरो रगत तिमीभित्र निदाओस्
मेरा चिन्ताहरू, मेरा छटपटीहरू तिमीमा निदाउन्
मेरा आँखाहरू तिमीमै चिम्लिइउन्
र मेरो हृदय
तिमीमै निदाओस्।