फ़ोकस / लछमण भाटिया 'कोमल'
शहरु सॼो ‘फ़ोकस’ में आहे।
शहर जा सभेई रस्ता
मुंहिंजे सामुहूं आहिनि।
हर शइ उस जे तिड़के में
चमकाट ॾिए थी
ऐं हू आवाज़नि-
चेहरनि खां बेपरवाह
हर रस्ते मां हली रहियो आ।
अजु हू मुंखे-
सभिनी चौंकनि, चोराहनि, बाज़ारियुनि में
ॾिसण अचे थो।
सभेई राहूं
मुंहिंजे आमुहूं सामुहूं आहिनि
शहर सॼो ‘फ़ोकस’ में आहे
ऐं हू गुम सुम
हर रस्ते ते हली रहियो आ।
ॼाणु उहो आवाज़ु फ़िजा में गूंजण लॻन्दो
वरी उहाई वठु-पकड़
जारी थी वेन्दी।
कंधु वराए वरी मूंखे
ॾिसिणो ई पवन्दो
उभो थियलु उस में को चाकू़!
फुड़ो फुड़ो थी फहिलियल
रत जी ॻाढी चादर
पंहिंजे ज़हन जे वारियासे में
डुकी रहियो आहियां बेमक़्सद
हिकु हिकु थीन्दे
सभेई रस्ता घुमी रहिया आहिनि-
ऐं हू मूंखे ॾिसी रहियो आ
सभिनी चौंकनि, चौराहनि, बाज़ारियुनि में
ऐं मां गुम-सुम हर रस्ते तां
सहिकी सहिकी साणो थीन्दो
अञा बि डोडूं पायां वेठो...
अञ बि डोडूं पायां वेठो...
