भारत की संस्कृति के लिए... भाषा की उन्नति के लिए... साहित्य के प्रसार के लिए
बंटवारौ / दीनदयाल शर्मा
Kavita Kosh से
बेटी रै ब्याव में
आप पधार्या
परवार समेत।
मन्नै घणौ हरख हुयौ।
थानै देख'र
म्हारी छाती हुयगी चौड़ी
अर पुराणी यादां हुयगी हरी
म्हूं देख्यौ
थारौ प्रेम पोळमपोळ हो
म्हूं
भीतर तांईं भरग्यौ
जदी
म्हूं थानै
बांथां में भर लिया
पण
नीं कह सक्यौ थानै
आपरै मन री मांयली बात
म्हूं दु:ख-सुख बांटणौ चावै हो
पण
टैम थानै भी नीं हो
अर टैम म्हानै भी।
