भारत की संस्कृति के लिए... भाषा की उन्नति के लिए... साहित्य के प्रसार के लिए
बरखा रोॅ दिन / नवीन निकुंज
Kavita Kosh से
सौनोॅ-भादोॅ केरोॅ पानी
जन्नेॅ देखोॅ हुन्नेॅ पानी ।
भूमि पर बिथरलोॅ पानी
सरंगोॅ में छितरैलोॅ पानी ।
तीन दिनोॅ सेॅ बरसै पानी
ऐलै ऐंगना-ओलती पानी ।
लकड़ी-गोयठोॅ रुसलैे जेना
सुतलोॅ छै कोय चद्दर तानी ।
कमाय-कोढ़ी केॅ लानै छेलां
साथै सतुआ सानै छेलां
केना करवै आबेॅ मजूरी
कौनें देतै दाना-पानी ?
गिरलै हमरोॅ माँटी के भीत
लेरू चपैलौ रे रंजीत
डकरै सब गैया बिन सानी
कहांँ सेॅ लानवै सानी-पानी ?
बुतरु देह पर चूऐ पानी
भींजलोॅ नुंगा काँंपै जनानी
लगै छै मेघेॅ सबकेॅ मारतै
गाल पेॅ थप्पड़ तानी-तानी ।
