बात हरयाणे की / दिनेश शर्मा
सीदे सादे बाणे की
दूध दही के खाणे की
आओ मिल कै बात करां
हाम्म आपणे हरयाणे की
घणी तरियां के रंग रंगी
हरयाणा की धरती
धरम क्षेतर कुरूक्षेत्र
चाल्लै धरम की चरती
पराचीन सै पाणीपत
सबतै बात सुणाणे की
आओ मिल कै बात
आदिबद्री जमनानगर
सरस्वती का उदगम थल
फरीदाबाद का गौरव
सूरज कुंड अर बड़खल
सुथरी धोल्ली संस्कृति
खुशी खुशी बतलाणे की
आओ मिल कै बात
माट्टी दादरी वीरां की
महेंद्रगढ़ रणधीरां की
करनाल करण नगरी सै
माता दानीवीरां की
रेजांगला तै सुणो कहाणी
चीनी घमंड मिटाणे की
आओ मिल कै बात
रोहतक,रेवाड़ी,जगाधरी,
कवावैं पीतल नगरी
सोनप्रस्थ बण्या सोनीपत
झज्जर मै सीतल झझरी
के के सै परसिदध आड़ै
सबतै बात बताणे की
आओ मिल कै बात
माई शीतला का गुडगांवां
दुनिया मै जाण्या जा
धामदेवसर सै भ्याणी मै
सबतै ऊपर मान्या जा
होया जित हर का आणा
वा माट्टी माथै लाणे की
आओ मिल कै बात
अंबाला फौज ठिकाणा
करै फौज सुरक्षा भारी
जीत की देवी,जयंती तै
बसी जींद नगरी प्यारी
गर्वीला इतिहास म्हारा
सीस गर्व तै ठाणे की
आओ मिल कै बात
सबके भरोसे का ठिकाणा
नूंह मै शिवमन्दिर प्यारा
पंचवटी पलवल की सोभा
सै हिसार हड़प्पा धारा
सभ्यता संस्कारां के गीत
स्वाभिमानी हो गाणे की
आओ मिल कै बात
कैथल मै नवग्रह मंदिर
शाहकमाल बाबा का धाम
फल्कीवन की पवितर माटी
करै पितरां का उत्थान
सोमवती का माहातम
हर माणस तै सुणवाने की
आओ मिल कै बात
देखी साथियों थामनै
या छोट्टी सी झलकी
हरयाणा सै सुरग समान
कती बात नहीं सै हलकी
सामूगढ़ बण्या फतेहाबाद
नगर एक बस जाणे की
आओ मिल कै बात
सरस्वती के कांठै सिरसा
छैल छबीला प्यारा
माता मनसा राखै सै
ध्यान पंचकूला का भारया
खूब करी कोसिस दिनेश नै
हरयाणा दिखलाणे की
आओ मिल कै बात
