भारत की संस्कृति के लिए... भाषा की उन्नति के लिए... साहित्य के प्रसार के लिए
भरोसा / गीता त्रिपाठी
Kavita Kosh से
सकिँदोरहेनछ
डोरीविना कुनै हिमाल चढ्न
यी चिप्लिरहेका पाइलाहरू
यी फुस्किरहेका हातहरू
यी बिलाइरहेका अक्षरहरू
ए! अगाडि जाने आरोही !
सक्छौ तिमी
यो आउने युगका लागि
एउटा बलियो डोरी बाटेर जान ?
याद राख
सर्प नहोस् त्यो डोरी
नडसोस् त्यसले
पछ्याउनेहरूलाई !
सकिँदोरहेनछ
किलाविना कुनै डोरी अड्काउन
ए! डोरी बाटेर जाने आरोही !
सक्छौ तिमी पछ्याउनेहरूका निम्ति
एउटा बलियो किला ठोकेर जान ?
याद राख-
छेकबार नबनोस् त्यो किला
नरोकोस् त्यसले
अगाडी जानेहरूलाई !
