म कसरी भनूँ यो माया हो / गोपाल योञ्जन

म कसरी भनूँ यो माया हो, न तिमी मेरी न म तिम्रो
बरू भनिदेऊ यो सपना हो, जो तिम्रो हो अनि मेरो

यति नगिच भएर पनि हामी टाढा नै हुनुपर्छ
एकै नदी भएता पनि हामी दुईटा किनार हुनुपर्छ
म कसरी भनूँ यो मिलन हो, न तिमी मेरी न म तिम्रो

तिम्रो मन मैले जितेर पनि आफैँसित म हार्नुपर्छ
कलिला कोमल प्रीतिको बेला फुल्नुअघि नै मार्नुपर्छ
म कसरी भनूँ यो सङ्गम हो, न तिमी मेरी न म तिम्रो