भारत की संस्कृति के लिए... भाषा की उन्नति के लिए... साहित्य के प्रसार के लिए
मया-पिरित जब पनके रे / पीसी लाल यादव
Kavita Kosh से
मया-पिरत जब पनके रे
मन अंतस ह गद के रे।
गीत झरे होंठ ले गुरतुर
पाँव म घुंघरु छनके रे॥
जांगर पेर पछीना ओगरा,
जिनगी ल अपन तैं सुघरा।
महल बरोबर सरव देवय,
काँड़-कोरई के कुंदरा॥
तन के सवाँगा का काम के?
साज सवाँगा मन के रे॥
मनखे उही मनखे आय।
जेन सब ल अपन जानय
पर के सुख-दुख ल जउन
सऊँहे अपनेच् मानय॥
देख में आथे ओ टूट जाथे,
रहिथे जेन ह तन-तन के रे।
सौ बरस जिए करुवा के,
तउनो तो घलो बेकार हे।
मया-पिरित के छिन भर ह
सौ-सौ जनम के सार हे॥
जिनगी के खेती म बों ले
सतकरम बीजहा घन के रे।
