भारत की संस्कृति के लिए... भाषा की उन्नति के लिए... साहित्य के प्रसार के लिए
मानसी री उदासी / दीनदयाल शर्मा
Kavita Kosh से
म्हूं बटाऊचारै
ब्याव में गयौ
जैपर
अर
इग्यारै बरसां री
बेटी मानसी भी
ही साथै
ब्यावआळां रै
पूगतांईं घरां
म्हे
खड़्या रैया
घणी ताळ
आंगणै बिचाळै
बठै मचरी
आफळ-ताफळ
अर
सगळा होर्या
उकळ-चुकळ
म्हारी आँख्यां में झांकती
घर नै सरांवती
अर
घरआळां नै
बिसरांवती
मानसी बोली
पापा
मकान तो
भौत फूटरौ है
पण लोग
चोखा कोनी
म्हूं बोल्यौ
ईंयां नीं कैया करै
थोड़सीक ताळ में
तैं
के देख लियौ इस्सौ
बा
उदास होय'र बोली
अजे तांईं
कणी बैठण रो ई
नीं कैयौ
म्ह होळैसीक बोल्यौ
होळै बोल
औ
सै'र है
गांव थोड़ो ई है
सै'र रा
नेम कायदा
अळगा हुवै।
