भारत की संस्कृति के लिए... भाषा की उन्नति के लिए... साहित्य के प्रसार के लिए
मुकरी / रामविलास
Kavita Kosh से
तीन दोस के चारम खाए
इज्जत चारम के बढ़ जाए
पूछे ओकरा सकल जहान
की सखि साजन? न∙ सखि पान.
अप्पन बल के करे न आस
अनकर घर में ओक्कर बॉस
नामे सुन सब जाए काँप
की सखि साजन? न∙ सखि सांप.
खाइते आबे भागल रोग
ओकरा तनिका चीखे लोग
जाड़े खाइते बत्था दोहरा
की सखि माहुर? न∙ सखि कोहरा.
प्रान त्याग के करे भलाई
चार भेस में करे दबाई
कांचे पीसल घोरल गरदी
की सखि तुलसी? न∙ सखि हरदी.
चाहे केतनो जोर लगाबे
कोनो ओकरा छिपा न पाबे
भारी ओक्कर सब दिन सोखी
की सखि दौलत? न∙ सखि खोंखी.
मधसन मिठगर ओक्कर बात
अंतरी ओक्कर बाओन हाथ
उनकर सम्वत पर ऊ घोरन
की सखि नेता? न∙ सखि फोरन.
अंग-अंग हए गुन के खान
दुनिआ पर ऊ छींटे जान
मंगलपथ के हए ऊ जात्री
कि सखि साजन? न∙ सखि धात्री.
